Drejtuesit e Interit kanë ndërmend të kënaqin Antonio Conten përpara nisjes së grumbullimit në Lugano dhe janë angazhuar maksimalisht që të sjellin në Milano sulmuesin belg të Manchester United, Romelu Lukaku.
Mbrëmjen e sotme në zyrat e klubit zikaltër u rikthyer sërish Federico Pastorello, menaxheri i sulmuesit belg, i cili po diskuton me drejtuesit zikaltër, për të formuluar një tjetër ofertë, që do të kënaqë “djajtë e kuq” të Manchesterit.
Deri tani anglezët kanë refuzuar dy ofertat e Interit për Lukakun, duke mos pranuar asnjë lojtar në shkëmbim, përveç mbrojtësit Skriniar, por zikaltrit do të tentojnë të ndryshojnë formulën e transferimit, për të arritur rezultat.
Ausilio dhe Marotta kanë në anën e tyre sulmuesin belg, i cili e ka ndarë mendjen të largohet nga Manchesteri dhe të bashkohet me Antonio Conten te Interi, pasi në “Old Trafford”, Solskjaer e shikon vetëm si sulmues alternativë.