Samir Handanoviç vazhdon të jetë një nga pikat më të fortë të Interit dhe jo më kot mban edhe shiritin e kapitenit në krah, por mosha e tij i ka vënë drejtuesit në lëvizje për të gjetur një pasues të denjë për të mbrojtur katërkëndëshin e portës.
Kështu sipas mediave italiane, në vëmendjen e drejtuesve zikaltër Marotta e Ausilio, ka përfunduar portieri argjentinas i Udineses, Juan Agustin Musso, i cili po bën paraqitje mjaft të mira në këtë fillim sezoni.
Përveç tij, zikaltrit po ndjekin me vëmendje edhe ecurinë e fantazistit bardhezi Rodrigo De Paul, që përveçse po luan mjaft mirë në kampionatin italian, është shndërruar në një titullar edhe në kombëtaren argjentinase.
De Paul shihet si një alternativë e vlefshme, që mund të zëvendësojë mjaft mirë si Sensin, ashtu edhe Barellën, pasi disponon cilësitë e duhura për ta bërë këtë, ndërsa drejtuesit e Interit po mendojnë një ofertë prej 50 milionë eurosh, për të marrë dy argjentinasit.
