Juventusi duhet ta harrojë sa më shpejt këtë sezon. Bardhezinjtë humbën 4-2 finalen e Kupës së Italisë ndaj Interit, njësoj siç ndodhi edhe në finalen e Superkupës në janar, ndaj po të njëjtit kundërshtar.
“Zonja e vjetër” mbyll një sezon pa trofe pas 11 vitesh, teksa ish-mesfushori Claudio Marchisio uron zikaltrit e Simone Inzaghit në postimin e tij në rrjetet sociale, aty ku ndër të tjera shkruan:
“Është hera e parë prej vitit 2011 që Juventusi mbyll një sezon pa trofe. Janë realisht shumë, shumë, shumë vite. Kur dikush do arrijë të bëjë atë që Juventusi ka bërë për kaq shumë kohë, vetëm atëherë unë do të mund të pranoj disa komente…
Urime Interit, e meritoi këtë finale. Një ekip që është sigurisht superior ndaj Juventusit tim të dashur. Do të ketë kohë më të mira. Por momentet tona të errëta janë sigurisht më të shkurtra se të gjitha të tjerat”, thekson Marchisio.
