Simone Inzaghi ka konfirmuar në konferencën e sotme për shtyp, se do të lërë pushim disa prej titullarëve të zakonshëm të skuadrës, ndërsa u shpreh se ka ardhur koha që edhe të rinjtë, ata që kanë luajtur më pak, të kenë mundësinë e tyre. Trajneri i Lazios zbuloi edhe emrat e parë që do të luajnë si titullarë, ndërsa bëhet fjalë për Palombin dhe Creccon, futbollistë te të cilët tekniku bardhekaltër beson shumë.
“Duke qenë se jemi kualifikuar, mendoj se është momenti i duhur për t’i dhënë pak frymëmarrje futbollistëve që kanë luajtur më shumë deri në këto momente. Përveç kësaj, është një ndeshje pa presion dhe takime të tilla janë ideale për t’i dhënë besim futbollistëve të rinj. Kështu, nesër do të luajnë nga minuta e parë, Palombi dhe Crecco”, u shpreh Inzaghi.
Trajneri i Lazios u rikthye edhe një herë të komentojë humbjen në derbi, ndërsa i qëndroi sërish mendimit të tij se takimi u vendos nga 2 gabime individuale.
“E thashë edhe në përfundim të derbit, por edhe tani jam i të njëjtit mendim. Sfidën me Romën e humbëm vetëm për shkak të 2 gabimeve individuale, që i ndodhin kujtdo dhe që patëm fatin e keq të na ndodhnin në derbi. Nuk ka vend për kritika, por vetëm për punë, sepse duam të rikthehemi menjëherë të fitorja, që të dielën ndaj Fiorentinës”, tha trajneri i Lazios.
