Simone Inzaghi në ankth për gjëndjen e Ciro Immobiles vetëm pak orë përpara derbit të shumëpritur ndaj Romës. Trajneri i Lazios nuk e di ende nëse do të mund të mbështetet te ylli i ekipit dhe golashënuesi më i mirë i Serisë A, në sfidën ndaj rivalëve të urryer të Romës dhe diçka të tillë e la të kuptohet në konferencën e zakonshme për shtyp përpara kësaj super përballjeje.
“ Ndien ende shqetësime nga ai problem që kishte në vigjilie të sfidës ndaj Udineses. Dje ky problem iu shfaq sërish. Do të vlerësojmë gjëndjen e tij. Të shohim si do të reagojë Immobile por shpresojmë shumë ta kemi gati”.
Më pas trajneri i skuadrës bardhekaltër u ndal të fliste për ndeshjen ndaj Romës.
“ Kjo nuk është një sfidë e ngjashme me të tjerat. Duhet të vrapojmë shumë. Do të luhet një futboll i bukur për këtë të jeni të sigurtë. Duhet të kemi grintë në fushë por edhe vendosmëri. Do të përballemi me një skuadër që ka shumë kualitet”.
