Ndryshe nga një vit më parë kur pretendoi deri pranë fundit të kampionatit për titullin kampion, këtë sezon Lazio e ka nisur në mënyrë zhgënjyese, pasi ka arritur të regjistrojë një fitore, një barazim dhe dy humbje në katër javët e para, duke mbetur në kuotën e 4 pikëve.
Disfata e radhës u regjistrua të shtunën në transfertën ndaj Sampdorias me rezultatin e pastër 3-0, ndërsa trajneri Simone Inzaghi e cilësoi paraqitjen e bardhekaltërve, si një nga më të dobëtat që kur është ulur në stolin e Lazios.
“Ndaj Sampdorias kemi bërë paraqitjen më të dobët të viteve të fundit, por e rëndësishme është që djemtë e kanë të qartë se ku kemi gabuar. Shpresoj që të bëjmë kthesën në ndeshjen e Ligës së Kampionëve ndaj Borussias së Dortmundit”, u shpreh tekniku i Lazios.
Mjaftoi një start i dobët i kampionatit, që në Itali të nisin thashethemet për një shkarkim të mundshëm të Inzaghit dhe zëvendësim të tij nga ish tekniku i Juventusit, Massimiliano Allegri. Vetë Inzaghi i quajti normale këto zëra në futboll, por hodhi poshtë mundësinë e largimit të tij, teksa theksoi edhe njëherë se po negocion rinovimin e kontratës.
“Në futboll është normale që të lakohen emrat e zëvendësuesve, kur merr disa rezultate negative radhazi, por në rastin konkret jam i sigurt që nuk ka asgjë të vërtetë. E njoh mirë presidentin Lotito dhe e di se po të kishte diçka që nuk shkon, do më kishte vënë në dijeni. Problemi ynë i vetëm është që na pret një ndeshje ndaj një kundërshtari si Dortmundi, shumë i fortë dhe me eksperiencë në Europë. Sa i përket rinovimit, vijojnë negociatat”, tha Inzaghi.