Humbja me Bolognën duket se nuk e dekurajon Simone Inzaghin, që bën thirrje për ringritjen e Interit të tij në sprintin final të sezonit, duke nisur nga ndeshja e nesërme në transfertën ndaj Udineses.
“Jemi vetëm dy pikë larg kreut dhe gara për titullin është e hapur, por unë nuk mendoj ku mund të lërë pikë Milani. Jam i përqendruar te sfida e nesërme ndaj Udineses, një kundërshtar në formë mjaft të mirë dhe dua të fitojmë për të besuar deri në fund”, deklaroi trajneri Inzaghi.
Ionut Radu zëvendësoi Handanovicin e dëmtuar në transfertën emiliane ndaj Bolognës dhe pavarësisht gafës së rëndë që vendosi ndeshjen, mund të marrë një tjetër konfirmim si titullar edhe në Friuli.
“Handanovic ka një dëmtim të rëndësishëm, që duhet marrë në konsideratë, por vetëm nesër do të vendosim për aktivizimin e tij. Nëse nuk ia del, do të luajë Radu, që është një portier mjaft i mirë dhe ka besimin tim total, pavarësisht asaj që ndodhi në Bologna”, tha trajneri i Interit.
