Ipko Superliga e Kosovës ka arritur në fazën më të nxehtë. Këtë mesjavë do të luhen ndeshjet e javës së 29-të, e cila do të nisë këtë të mërkurë me 3 takime që do të transmetohen në Supersport. Spikat padiskutim sfida me Gjilanit dhe Prishtinës që do të nisë në orën 17:00, një duel për të mos u humbur në ekranin tonë mes skuadrës së Gentian Mezanit dhe formacionit të Armend Dallkut. Barazimi nuk i shkon përshtat asnjërës prej dy skuadrave që rivalizojnë bashkë me Dritën dhe Ballkanin për titullin dhe për këtë arsye parashikohet një duel i nxehtë që premton emocione të mëdha.
Aktualisht diferenca në renditje mes këtyre dy ekipeve është vetëm 2 pikë në favor të Prishtinës, por ecuria e “skifterave” dhe kryeqytetasve në 5 ndeshjet e fundit është identike me 4 fitore dhe nga një barazim dhe për këtë aryse kjo sfidë nuk ka favorit. Pasditen e sotme do të zbresë në fushë edhe Ballkani i Ismet Munishit që do të presë në Suharekë Llapin. Një ndeshje deri diku e lehtë në letër për formacionin “portokalli” edhe pse duhet theksuar që Llapi nuk ka siguruar ende mbijetesën. Ndërkohë Drenica pret në shtëpi Ferizajn që thuajse e ka prerë biletën për në ligën e parë me shpresën për të marrë tre pikët që do ta largonin disi nga zona e rrezikut të rënies nga kategoria. Të treja këto sfida do të startojnë në orën 17:00 dhe do të transmetohen live në Supersport.