Jo gjithnjë një ish-futbollist mund të rezultojë i suksesshëm në rolin e trajnerit. Mirëpo, nuk duket se është ky rasti i Fernando Gagos, ish-mesfushorit të Real Madrid nga viti 2006 deri në vitin 2011 që me Los Blancos fitoi edhe një La Liga.
I tërhequr nga futbolli në nëntor të vitit 2020 si pasojë e dëmtimeve të shumta, tashmë Gago vetëm 36-vjeçar po shkëlqen në botën e trajningut teksa në Argjentinë drejton Racing Club. Argjentinasi po bën shumë mirë në vendlindje dhe ka marrë vëmendjen për stilin që aplikon në fushë teksa skuadra e tij është sulmuese, por pa humbur ekuilibrat në prapavijë me ish-futbollistin që ka gjetur balancat e duhura në fushë.
Në këtë sezon, Racing e ka treguar veten ndaj rivalëve “Big” si River Plate apo Boca Juniors ndërsa synon t’i shkojë deri në fund Kupës Amerikano-jugore teksa aktualisht është në vendin e dytë në Grupin B, por me pikë të barabarta me skuadrën e Melgar nga Peruja.
Pa lënë mënjanë edhe faktin se Racing i Gagos është i pari në Kupën e Ligës në Argjentinë dhe është e vetmja skuadër me zero humbje duke lënë pas River Plate.
Ndërkaq, një tjetër aspekt që ka tërhequr vëmendjen është edhe stili i veshjes së Gagos, i cili gjithnjë prezantohet shumë i kuruar duke ruajtur elegancën të cilën kërkon t’ia përcjellë edhe skuadrës në fushë.
Në këtë formë, janë disa klubet braziliane që mendojnë t’i ofrojnë postin e trajnerit Gagos, ndërsa shumë shpejt, 36-vjeçari mund të “zbarkojë” edhe në Europë për të treguar veten siç bënte në kohën kur ishte në rolin e futbollistit.