Mund të bëhej pasardhësi i portierit mitik Horge Kampos, por në të vërtetë, do ta kalojë pjesën e mbetur të jetës në burgun famëkeq të Kaderejta në shtetin e Nuevo Leon.
Drejtësia meksikane vendosi të japë një dënim të ashpër me 75 vjet burgim për portierin e njohur Omar Ortiz Uribe në fundin e një procesi që zgjati thuajse 7 vjet, dhe që e vendosi mes kapobandave fajtore për një sërë krimesh.
Ortiz, që u pagëzua nga tifozët me pseudonimin “Macja” për pritjet e tij karakteristike, fitoi shpejt një vend në kombëtaren meksikane, por fama dhe paratë nuk e mbajtën në anën e drejtë të jetës.
Ai vuajti një dënim për doping në vitin 2010, pas një testi pozitiv në Kupën Libertadores, episod që shënoi dhe nisjen e një rënieje drastike në karrierë.
Pikërisht kur ishte në fundin e skualifikimit për doping, futbollisti meksikan u arrestua si pjesë e një bande rrëmbyesish që kërkonin shuma të majme për të liruar pengjet.
Kjo ishte vetëm një nga akuzat që i dhanë dënimin këtë javë me 75 vjet burgim, sanksioni më i lartë ndaj Omar Ortiz, krahasuar me anëtarët e tjerë të bandës.
Drejtësia meksikane provoi pjesëmarrjen direkte të futbollistit në të paktën 3 rrëmbime, mes të cilëve dhe një në të cilin u zhduk një vajzë minorene.
