Ish sulmuesi kroat i Bayernit të Mynihut, Ivica Oliç deklaroi për mediat e vendit të tij se klubi bavarez do të ushtrojë të drejtën e blerjes së Ivan Perisic në fund të sezonit, pavarësisht shkarkimit të Niko Kovac.
Ky i fundit kërkoi me ngulm Perisic në Mynih dhe drejtuesit e klubit e morën në huazim me të drejtë blerjeje gjatë verës nga Interi, por pak ditë më parë vendosën të shkarkojnë Kovac, duke bërë që të hidhen pikëpyetje mbi blerjen e futbollistit.
“Kam folur edhe me të tjerë te Bayern dhe të gjithë janë të kënaqur me performancën e Perisic, ndaj jam i bindur që do ta blejnë, ndonëse tani nuk është më Niko si trajner. Ivan ka luajtur pak, por ka bërë mirë sa herë që ka zbritur në fushë dhe në fillim të vitit tjetër, kur të ngjeshet kalendari, jam i bindur që do të ketë mundësi të luajë shumë më tepër”, deklaroi Oliç.
