Atalanta do të luajë për herë të parë në histori në grupet e Champions Leagues dhe për t’u përfaqësuar denjësisht zgjodhi të afrojë në skuadër një mbrojtës ekspert si sllovaku Martin Skrtel, i cili ka veshur edhe fanellën e Liverpoolit.
I ardhur nga Fenerbahce, 34-vjeçari firmosi me bergamaskët vetëm 3 javë më parë, por sot ka kërkuar zgjidhjen e kontratës, me arsyetimin se nuk ka gjendjen e duhur fizike, për të ndihmuar Atalantën në Champions e kampionat.
Futbollisti nuk u grumbullua në javën e parë të kampionatit nga trajneri Gasperini, teksa në Itali këmbëngulin se përtej problemeve fizike, ka qenë pikërisht marrëdhënia me trajnerin, ajo që solli divorcin kaq të shpejtë të Skrtel me Atalantën.
Kur kanë mbetur edhe disa orë nga mbyllja zyrtarisht e sezonit të merkatos, bergamaskët e gjejnë veten kështu me një mbrojtës më pak në organikë dhe do të duhet të tentojnë të përforcohen, për të mos vuajtur më pas gjatë sezonit.
