Italia dhe Portugalia janë dy skuadrat e para që siguruan nga një biletë për në fazën gjysmëfinale të kampionatit europian të 19-vjeçarëve që po zhvillohet aktualisht në Finlandë. Të kaltrit barazuan 1-1 ndaj Norvegjisë duke e mbyllur grupin A në vendin e parë në kuotën e 7 pikëve dhe tashmë do të masin forcat në raundin tjetër me skuadrën që do të pozicionohet e dyta në grupin B. Goli i talentit të Juventusit Kean që i ardhur në fushë nga stoli pas një asisti të lojtarit më të ri të Romës, Zaniolo i evitoi humbjen Italisë, me Kean që iu përgjigj golit të avantazhit provizor të sulmuesit norvegjez të Moldes Haland i cili kërkohet nga disa prej klubeve më të rëndësishme të Europës. Gjithsesi Norvegjisë edhe një fitore 1-0 nuk do t’i mjaftonte për të avancuar më tej. Nga ana tjetër Portugalia bëri detyrën ndaj Finlandës skuadrës më të dobët të grupit duke triumfuar 3-0 me golat e Jota, Jose Gomez dhe Dju, duke e mbyllur grupin në vendin e 2-të.