Italia është kokë serie në shortin e play off-it, që do të thotë se pavarësisht frikës dhe polemikave të shkaktuara sidomos pas barazimit me Maqedoninë, skuadra e Venturës e ka arritur objektivin minimal në këto eliminatore. Tashmë “të kaltrit” presin me ankth shortin e 17 tetorit, për të mësuar kundërshtarin në play off, por me avantazhim e zhvillimit të sfidës së kthimit në shtëpi.
Lajm i mirë për Italianë është fakti që edhe Kroacia e Danimarka do të jenë në vazon e të favorizuarave, sikurse Portugalia, nëse nuk do të arrijë të mposhtë Zvicrën në shtëpi.
Kundërshtarët e Italisë në play off do të jenë Greqia (duhet të fitojë me Gjibraltarin), Suedia (që nuk duhet të humbasë 7-0 me Holandën), Irlanda ose Irlanda e Veriut. Gjithmonë duke menduar që Franca nuk do të bëjë vetëvrasje me Bjellorusinë, me Danimarkën që me këtë skenar do të zbriste në vazon e dytë.
Sido që të mbyllet faza eliminatore, Italia është me fat sa u përket kundërshtarëve që do të ketë përballë në play off, pasi janë ndjeshëm më inferiorë.