Vijon kampionati Botëror i volejbollit për femra, që po zhvillohet në Japoni.Edhe pse ndeshja e fundit për Italinë ishte thjesht një formalitet, pasi “të kaltrat” e kishin siguruar kualifikimin për në “Final 6”, arritën të fitonin 3-1 përballë Shteteve të Bashkuara. Gjithçka nisi në mënyrën më të mirë për italianet të cilat fituan setin e parë 25-16 e të dytin 25-23. Kampionet në fuqi dhanë shenja jete në setin e tretë, të cilin e fituan 20-25. Gjithsesi, në të katërtin, vajzat e tranjerit Mazzanti nuk falën, duke e mbyllur me rezultatin 25-16, e njëkohësisht të gjithë ndeshjen. Aktualisht, Italia është Kombëtarja e vetme pa asnjë disfatë në këtë kampionat Botëror, e kanë gjithsej vetëm 3 sete të humbura. Megjithatë pavarsisht humbjes Shtetet e Bashkuara të Amerikës gjithashtu u kualifikuan për në fazën finale si vendi i tretë në grup.
Një tjetër takim mjaft interesant ishte ai mes Kinës e Rusisë, ku kombëtarja aziatike fitoi këtë sfidë me rezultatin 3-1. Seti i parë u fitua pikërisht nga kinezet me rezultatin 25-22, por tek i dyti ruset barazuan gjithçka, pas suksesit 21-25. Seti i tretë, i cili ishte më i luftuari, por dhe deçizivi në këtë takim u mbyll me rezultatin 25-23 në favor të kinezeve, që fituan me lehtësi edhe setin e rradhës 25-15. Pas kësaj humbjeje, Rusia u eliminua nga ky kampionat Botëror, ndërkohë që Kina u kualifikua në “Final 6” si vendi i dytë në grup, pas Italisë.Ky Botëror, është futur në fazën më të nxehtë, me kombëtaret që i afrohen gjithmonë e më shumë trofeut më të rëndësishëm për këtë sport.
