Gjashtë muaj te Kamza, për të realizuar një transferim të rëndësishëm, mbi të gjitha në aspektin financiar. Kaq i mjaftuan Ivan Fustar, që pas gjysmës së parë të kampionatit te ekipi surprizë i këtij edicioni të largohej sërish nga Shqipëria.
Edhe pse kërkohej me ngulm nga Partizani, mbrojtësi kroat zgjodhi që destinacioni i tij i radhës të jetë Katari, ku do të mbrojë ngjyrat e Al Arabit. 28-vjeçari firmosi me skuadrën e re, aty ku ka gjetur një njohje të vjetër të kampionatit shqiptar, bashkëkombasin e vet dhe ish-trajnerin e Dinamos, Luka Bonačić.
Pasi kaloi testet mjekësore, Fustar firmosi kontratën 6-mujore me opsion rinovimi dhe u prezantua menjëherë me ekipin e ri. Lojtari nuk humbi kohë, duke iu bashkuar menjëherë grupit në stërvitje. Mbrojtësi pritet të debutojë prej kësaj fundjave, me skuadrën që do të luajë në trasfertë përballë Al Sailia-s.
Momentalisht Al Arab pozicionohet në vendin e 9-të të Premierligës në Katar dhe Fustar cilësohet një përforcim i domosdoshëm për mbrojtjen, me skuadrën që lufton për të qëndruar mes më të mirëve.