IPKO Superliga e Kosovës vijon rrugëtimin e saj edhe këtë fundjavë me javën e 17-të të kampionatit. Pas ndeshjeve të Digitalb Kupës në mesjavë sot luhen 4 sfidat e para të raundi, 3 prej të cilave mund t’i ndiqni live vetëm në Supersport. Feronikeli do të ketë mundësinë ideale për të marrë përkohësisht kreun sot pasi pret në shtëpi Flamurtarin. Skuadra e Zekerija Ramadanit nuk do ta ketë të lehtë ndaj ekipit kryeqytetas megjithatë në shtëpi formacioni nga Drenasi rrallë gabon. Një sfidë shumë interesante do të luhet edhe në Podujevë aty ku Llapi vendas pret Lirinë që di të surprizojë shpesh dhe tashmë ka një trajner italian në stol. Nuk duhet të gabojë as Gjilani që në shtëpi përballë Ferizajt do të luajë vetëm për 3 pikët ndërsa Drenica pritet ta ketë thjeshtë një formalitet suksesin ndaj KEK-ut që e ka prerë biletën për në ligën e parë që në gjysmën e kampionatit.
