Java 32-të e Superiores mund të vendosë shumë mbi fatet e mbijetesës. Pavarësisht se Luftëtari dhe Tirana kanë një distancë të konsiderueshme me Kastriotin, gjithçka mbetet e hapur me krutanët që ende nuk janë dorëzuar. Pikërisht kjo javë mund të japë sinjalet nëse gara për të shoqëruar Kamzën drejt rënies do të vazhdojë deri në fund apo jo. Jo gjithçka varet nga Kastrioti që duhet së pari të kalojë një transfertë tejet të vështrië në Laç ndaj vendasve. Falë rezultateve pozitive në dy javët e fundit ndaj skuadrave si Skënderbeu dhe Partizani, bardhezinjtë kanë ndezur shpresën e zonës europiane. Pikërisht uria e kurbinasve për të synuar deri në fund këtë objektiv prish disi humorin e Kastriotit që e sheh një malore të vështirë transfertën e Laçit. Gërshetimi i kësaj jave sjell duelet e skuadrave të mbijetesës me ato që synojnë Europën.
Tirana ndryshe nga Kastrioti dhe Luftëtari ka avantazhin të luajë në shtëpi ndaj Skënderbeut. Përveç faktit që do të ketë mbështetjen e tifozerisë, bardheblutë fërkojnë duart edhe për faktin se ka rikthime në skuadër ndërkohë që me mungesa shkojnë kampionët e Skënderbeut. Ndërkohë të vështirë e ka edhe Luftëtari që në Niko Dovana gjen Teutën e cila synon të sulmojë Flamurtarin pas pikës së marë me Kukësin. Megjithatë gjirokastritët janë disi më të qetë duke qënë se në llogarinë e tyre është sfida me Kamzën dhe dy duele shtëpiake deri në fund të kampionatit. Për këtë arsye java 32-të merr një rëndësi të veçantë në garën e mbijetesës, që vetëm matematika mund ta mbajë të hapur deri në fund.