Barcelona është duke menduar për të përforcuar të gjithë repartet dhe ndërsa në sulm do që të ketë yllin e Bayern Munich, Robert Lewandowskin, për mbrojtjen dëshiron të marrë Lucas Hernandez prej kampionëve të Gjermanisë.
Me largimet e pritshme të Clement Lenglet dhe Samuel Umtiti, si dhe me Gerard Pique që po sheh perëndimin e karrierës si futbollist, një qendërmbrojtës është i nevojshëm. Ndërsa po ashtu duhet edhe një mbrojtës i majtë, në mënyrë që Jordi Alba të mund të marrë pak frymë. Probleme të cilat Barça mund t’i zgjidhte vetëm me një emër, atë të Lucas Hernandez.
Sipas raportimeve në Spanjë mësohet se Lucas Hernandez është një nga emrat e preferuar nga Xavi për t’ju bashkuar katalanasve. Lojtari i bavarezëve ka qenë prej kohësh në krye të listës së preferancave te “blaugranat”.
Kontrata e mbrojtësit francez me bavarezët zgjat deri më 2024-ën, ndërsa nuk dihet nëse klubi do e shesë 26-vjeçarin.