Nëse sfida mes Luftëtarit dhe Vllaznisë përfundoi me rrjeta të paprekura, merita shkon edhe për portierët. Të paktën në disa raste, Alen Sherri i Vllaznisë ishte vendimtar në ndërhyrjet e tij. Në intervistën dhënë në emisionin “Gola pas Goli”, Sherri foli edhe për situatën e krijuar në kampin shkodran pas sulmit të turpshëm ndaj trajnerit Gjoka.
“E kemi kthyer presionin në force. Skuadra kishte ardhur me synimin për të fituar në Gjirokastër pavarësisht se terreni ishte i vështirë dhe nuk të lejonte të luaje ashtu siç ne jemi mësuar të luajmë. E dinim që do të ishte një ndeshje e vështirë, gjithsesi zhvilluam një ndeshje të mirë. Dhamë maksimumin dhe jam i kënaqur për pikën.”
Sherri prej vitesh konsiderohet një portier i talentuar dhe tashëm ka ardhur momenti që ai të jetë portieri i parë i Vllaznisë.
“Talenti në qoftë se punon dhe stërvitet shumë, nuk ka ku shkon, do t’i vijë rasti dhe mundësia. Besoj që kështu ka ndodhur dhe ka për të ndodhur gjithmonë. Zoti e ka shpërblyer punën time.”