Mirel Josa humbi derbin e trajnerëve shqiptarë ndaj Shpëtim Duros, pasi Drita fiti 1-0 me Prishtinën. Trajneri tiranas e pranoi se emërimi i Duros në krye të skuadrës nga Gjilani pati impakt pozitiv te futbollistët.
“Konkurrenca është ndryshe në Kosovë. Nuk është problemi vetëm te shënimi i golave që nuk vijnë, por edhe te pasimi i fundit. Duhet të kishim qenë më të kujdesshëm të pasonim për shokët. Ndërrimi i trajnerit, është një plus për skuadrën kundërshtare, se të gjithë futbollistët ishin të mobilizuar maksimalisht për të dhënë maksimumin. Drita e kishte si ndeshje të fundit për për të qenë ku i takon”.
Nga ana tjetër, Duro nuk e fsheh kënaqësinë e debutimit me fitore ndaj një skuadre shumë të fortë dhe me cilësi në fazën sulmuese.
“E rëndësishme ishte fitorja, për më tepër që vij nga Shqipëria. Pastaj erdhi ndaj Prishtinës me shumë cilësi përpara. Një fitore ndikon se skuadra ishte në situatë kritike. Nuk mund të jap premtime, i rëndësishëm ishte ky trepikësh. Nuk i kam njohur ende lojtarët. Unë ndikova në disiplinimin në fushë. Kam vetëm pak ditë këtu, jam munduar të disiplinoj skuadrën dhe ia kam arritur qëllimit”.