Një e mërkurë e mbushur me ndeshje dhe spektakël në Supersport. Një vëmendje të veçantë sot do ta marrin dy gjysmëfinalet e kthimit në Kupën e Italisë aty ku do të mësohen edhe dy skuadrat që do të diskutojnë mes tyre finalen e madhe që do të zhvillohet në Olimpico të Romës. Vetëm pak ditë pasi u shtya sfida e kampionatit për shkak të motit të keq, Juventusi pret në shtëpi Atalantën me një objektiv të vetëm të shkojë në finale për të synuar ta fitojë për herë të 4-t radhazi Kupën e Italisë, diçka që do të ishte historike pasi në kohët moderne kjo nuk ka ndodhur kurrë. Fitorja 1-0 në transfertë në ndeshjen e parë favorizon ndjeshëm bardhezinjtë e Allegrit të cilët pavarsisht mungesave do ta kenë më të lehtë të arrinë finalen. Juventus-Atalanta do të nisë në orën 17:30 dhe do të transmetohet live në Supersport 2. Në mbrëmje do të luhet edhe sfida më e interesante e këtyre gjysmëfinaleve. Lazio pret në shtëpi Milanin në superformë, me kuqezinjtë që pas Romës do të kërkojnë të mposhtin edhe bardhekaltrit brenda në kryeqytet. Barazimi 0-0 i ndeshjes së parë lë gjithçka të hapur, edhe pse vendasit janë disi më favoritë, pasi Lazio ka patur një ecuri më të mirë në Kupë këto vitet e fundit dhe sezonin e kaluar shkoi deri në finale. Lazio-Milan do të fillojë në orën 20:45 dhe do të transmetohet gjitashtu në kanalin Supersport 2. Por në ekranin tonë mesjava e kupave, sjell edhe “replay-in” e takimit, Tottenham-Rochdale. Në Wembley skuadra e Pochettinos do të kërkojë kualifikimin përballë modestëve që luajnë në kategorinë e tretë por që i ndalën gjelat e Londrës në një barazim 2-2 në ndeshjen e parë. FA Cup është një mundësi e mirë për Tottenhamin për të fituar trofe në këtë sezon dhe kualifikimi në çerekfinale është misioni i vetëm që kanë Spurs-at për momentin.