Humbja tronditëse ndaj Juventusit, që u përkthye në eliminim nga Liga e Kampionëve, duket se ka lënë pasoja te Atletico e Madridit, që sot pësoi një tjetër disfatë, këtë herë në kampionatin spanjoll.
Të besuarit e Diego Simeones nuk arritën t’i japin vazhdimësi serisë prej 4 fitoresh radhazi në La Liga, pasi u mposhtën me rezultatin 2-0 në transfertën baske ndaj Athletic Bilbaos.
Los Colchoneros bënë shumë pak për të fituar në këtë takim, ndryshe nga vendasit që treguan nivel të lartë grinte dhe shënuan dy herë në 20 minutat e fundit, fillimisht ne Inaki Williams dhe më pas me Kodro.
Humbja lë në vendin e dytë të renditjes Atleticon e Madridit, por mund t’i shërbejë Barcelonës që të shkëputet me 10 pikë diferencë në krye, nëse ia del të marrë maksimumin nga transferta andaluziane përballë Real Betisit.