Juventusi siguroi kualifikimin për herë të 4-t radhazi në finalen e Kupës së Italisë, teksa eliminuan Atalantën, duke fituar të dy takimet me rezultatin minimal 1-0.
Në sfidën e zhvilluar pasditen e sotme në ‘Allianz Stadium’, vendimtar ishte goli i shënuar nga Miralem Pjaniç, nga pika e 11-metërshit, 15 minuta nga fundi i takimit.
Gjithsesi, duket se edhe në këtë ndeshje bardhezinjtë do të përfundojnë në qendër të akuzave, pasi u ‘shpërblyen’ me një penallti inekzistente, nga gjyqtari Fabbri.
Matuidi u fut në zonën e Atalantës, pas një krosimi dhe u rrëzua në zonë, por pamjet filmike treguan se ishte një fluturim i francezit, më shumë sesa shtyrje e kundërshtarit.
Gjithsesi, skuadra e Allegrit siguron finalen e Kupës së Italisë, në pritje për të mësuar kundërshtarin, që do të vendoset në sfidën e mbrëmjes në ‘Olimpico’, mes Lazios dhe Milanit. Vlen të përmendet se Giorgio Chiellini do të jetë mungesa e madhe e finales së 9 Majit, pas ndëshkimit në takimin e sotëm.