Vendimi i trajnerit të Chelsea-t, Frank Lampard, për të lënë në stol Kepa Arrizabalagan mund të çojë në largimin e portierit gjatë merkatos së verës. Për shkak të situatës së vështirë që po kalon nën drejtimin e Lampardit, 25-vjeçari, që u ka kushtuar arkave të “bluve” të Londrës jo pak por 80 milionë euro, është gati t’u kërkojë drejtuesve të klubit largimin nga skuadra.
Nën drejtimin e Lampardit, spanjolli ka zbritur në fushë vetëm 24 herë, kur sfidën e fundit e ka luajtur ndaj Arsenalit më 21 janar. Kjo situatë aspak e këndshme mund ta çojë drejt largimit portierin, për të cilin nuk mungojnë ofertat.