Fantazisti brazilian Ricardo Kaka është rikthyer të flasë për aventurën e tij te Reali i Madridit, që nuk shkoi aspak mirë, pavarësisht pritshmërive.
Ai tha se kishte vuajtur shumë dëmtimet e shpeshta, por edhe mungesën e besimit nga ana e trajnerit Mourinho, që drejtonte ‘galaktikët’ në atë kohë.
“Te Reali u shkatërrova pasi nuk dhashë dot atë që kisha treguar te Milani. Isha krejtësisht i humbur. Në Itali më donin të gjithë, ndërsa në Spanjë donin që të ikja sa më parë. José Mourinho ishte një trajner i vështirë për mua. Kishim respekt për njëri-tjetrin, por gjërat ishin të ndërlikuara mes nesh. Kur mendoja se do të më jepte një mundësi, nuk ndodhte kurrë. Nuk i tregova dot se gëzoja formë të mirë. U stërvita shumë, luftova shumë dhe u luta shumë, por kur nuk e fitova besimin e trajnerit, kuptova që nuk mund të punoja më me të. Isha shumë i lumtur kur u ktheva prapë te Milani”, deklaroi Kaka