Edinson Cavani flet me zemër të hapur. Në një intervistë të gjatë dhënë për “Relevo”, sulmuesi uruguaian pranoi se i kërkoi ndihmë psikologut në faza të ndryshme të karrierës së tij.
Cavani theksoi se nevojën për të shkuar te psikologu e ndjeu pas humbjes së thellë të PSG-së ndaj Barcelonës, ndërsa shtoi se kishte kaluar gjendje ankthi.
“Duke marrë parasysh rëndësinë e aspektit mendor dhe emocional në futboll, është e habitshme që ka ende një paragjykim për të shkuar te psikologu. Hera e parë që shkova ishte pas humbjes së thellë 6-1 ndaj Barcelonës. Më goditi shumë, në 5 minuta gjithçka ndryshoi dhe ishte një goditje e rëndë. Nuk munda ta kontrolloja veten, edhe pse ishte “thjesht” futboll, ndjeva ankth, djersë të ftohta dhe marrje mendsh. Kisha frikë se mos më zinte gjumi dhe po mendoja nëse kisha ndonjë problem në kokë. Shkova te mjeku i PSG-së dhe ai më tha që kjo u ndodh shumë njerëzve, në çdo sektor. Kuptova se nuk isha një superhero.”-tha ai.
