Eduardo Alves da Silva do provojë emocione të forta gjatë duelit Brazil-Kroaci, i vlefshëm për çerekfinalet e Kupës së Botës Katar 2022. 39-vjeçari lindi në Rio De Janeiro, ndërkohë që numëron 29 gola të shënuar me kombëtaren kroate, fanellën e së cilës e veshi për herë të parë në vitin 2004.
Një skaut kroat nuhati talentin e sulmuesit që luante në vendlindje me Bangu. Eduardo firmosi me Dinamon e Zagrebit, skuadër me të cilën fitoi tre tituj dhe po kaq Kupa e Superkupa Kroacie. Ai fitoi titullin kampion edhe në Ukrainë e Poloni, respektivisht me Shakhtar Donetsk dhe Legian e Varshavës.
Në gushtin e vitit 2005, në Split zbarkoi Brazili për një miqësore ndaj Kroacisë vendase. Sfida përfundoi në barazim 1-1, Niko Kranjcar ndezi festën e tifozëve kroatë, ndërkohë që skuadra “seleçao” barazoi me një goditje dënimi fantastike të Ricardinhos.
Për rreth 20 minuta, Eduardo ishte sulmuesi i Kroacisë, ndërsa në krahun tjetër e udhëhiqte repartin ofensiv Ronaldo Fenomeni… Sot do e ketë zemrën të ndarë në dysh, por himnet do i këndojë të dyja.
Njësoj siç ndodhi në Botërorin Brazil 2014. Kroacia u ndesh në grup ndaj pesë herë kampionëve të botës në grupe, sfidë që përfundoi 3-1 për Brazilin. Eduardo donte të luante, por qëndroi gjatë 90 minutave në stol.
“Unë fola me djalin tim dhe ai më tha se donte t’i këndonte të dy himnet, atë kroat, për shkak të punës së tij, dhe atë brazilian, sepse Brazili i ka mbetur gjithmonë në zemër”, shprehej nëna e tij tetë vite më parë, ndërkohë që Eduardo do i këndojë sërish dy himnet e zemrës së tij.
