Të gjithë në ndjekje të PSG. Kampionati francez i futbollit do të nisë këtë të premte edicionin numër 82, ku pritet të jetë si gjithnjë një sezon i pasur me emocione nga fillimi deri në fund. Përpos ndryshimeve që mund të kenë pësuar disa skuadra, pretendenti numër 1 mbetet PSG me ose pa Neymarin.
Me futbollistë të kalibrit të tillë si Kylian Mbappe, Cavani, Di Maria e Thiago Silva, parizienët, që kanë fituar 6 nga 7 titujt e fundit në Francë, janë sërish në “pole position” dhe këtë e treguan edhe një javë më pare, duke fituar Superkupën e Francës.
Cilët janë rivalët? Monaco dhe Lyon. Pa “yjet” e PSG, por gjithsesi me lojtarë të kalibrit të Radamel Falcaos e Cesc Fabregasit, skuadra e drejtuar nga Jardim do të provojë të ndërhyjë në rrugën e kampionëve, të njëjtën gjë do të kërkojë të bëjë edhe Lyoni i Silvinhos.
Tekniku brazilian së bashku me drejtorin sportiv synojnë ta kthejnë Lyonin në lavdinë e dekadës së parë të këtij mijëvjeçari, kur “Les Gones” fituan 7 tituj kampion radhazi nga viti 2001 në 2008-ën. Meqë jemi tek Monaco e Lyoni, do të jetë pikërisht ky superduel ai që do të hapë siparin e këtij edicioni të Ligue 1. Sfida do të zhvillohet këtë të premte, në orën 20:45. Kjo përballje ashtu si i gjithë sezoni i kampionatit francez do të transmetohet “live” dhe ekskluzivisht në SuperSport.
