Rafael Nadal është aktualisht në Australi, aty ku po përgatitet për turneun e parë Grand Slam të vitit 2023, Australian Open që starton më datë 16 janar.
Tenisti spanjoll është kampioni në fuqi i këtij turneu, por gjendja fizike e 36-vjeçarit është në pikëpyetje për shkak të problemeve të hasura në fundin e vitit 2022. Vetë Nadal e pranon se situata nuk është e mirë, megjithatë shtoi se në ndeshjet e fundit pavarësisht rezultateve të munguara, ai nuk ka bërë paraqitje negative.
“Më duhet të luftoj, jam i detyruar ta bëjë këtë për të gjetur ritmin e duhur. Kanë mbetur edhe dy javë nga starti i Australian Open dhe nuk mund të them se është një situatë ideale për mua, por në të njëjtën kohë nuk mund të them se është edhe situata më negative e mundshme.
Së fundmi, mendoj se kam luajtur mirë, niveli nuk ka qenë i keq por thjesht me duhet të fitoj disa ndeshje për të pasur vazhdimësinë e duhur”, u shpreh tenisti nga Mallorca.