Sezonin e shkuar dhuroi grimca të një skuadre që në çaste të caktuara mund të dilte edhe mbi ekipet kryesore të Kategorisë Superiore, edicionin e ardhshëm Kamza kërkon të konfirmohet si një prej rivaleve në garën europiane. Për këtë arsye stoli i është besuar një njeriu me shumë përvojë në fushën e lojës si Pietro Vierkovud dhe ky i fundit megjithëse ndodhet në atdheun e tij në Itali ka nisur nga puna për të piketuar objektivat e merkatos. Klubi dhe vetë tekniku kanë zgjedhur një profil të ulët në fushatën e shit-blerjeve, duke punuar pas kuintave për të afruar lojtarë që mund të bëjnë diferencën. Një tjetër objektiv jo pak i rëndësishëm është mbajtja e disa prej futbollistëve që kontribuan në mbijetesën e Kamzës, një mbi të gjithë Sebino Plaku, por edhe Frashëri e Zguro.
Ideja e lojës e tekikut 59-vjeçar është e bazuar në një skemë më 3 lojtarë në repartin e mbrojtjes dhe në merkato po synohen pikërisht futbollistë që mund te pershtaten me këtë formulë.
Gurët e themelit për startin e edicionit janë vendosur dhe Kamza pritet ta nisë fazën përgatitore në fillimin e korrikut, periudhë stërvitore që do të zhvillohet në Itali, ku natyrisht janë programuar edhe disa takime miqësore me qëllim kolaudimin e skuadrës. Sezonin tjetër Kamza kërkon ti afrohet Europës dhe jo vetëm me emrat e rrugëve të qytetit.
