Kamza shkon me probleme të shumta në sfidën ndaj Luftëtarit, një duel në të cilin kërkohet maksimumi duke qënë se janë dy skaudra që synojnë të sigurojnë sa më shpejt mbijetesën. Ramadan Ndreu duhet të bëjë llogaritë me një emergjencë totale në skuadrën e tij për të ndërtuar formacionin që duhet t’i bëjë ballë gjirokastritëve. Kapiteni Sebino Plaku është një mungesë e sigurtë për skuadrën nga periferia e kryeqytetit, pasi sulmuesi u dëmtua në sfidën me Teutën dhe pritet të mungojë për një kohë të gjatë.
Gjithashtu mungesë tjetër e rëndësishme është ajo e mesfushorit Argjend Mustafa, lojtari që duhet të organizojë manovrën sulmuese i cili ka luajtur vetëm 26 minuta ndaj Kukësit. Po në mesfushë pritet të mungojë edhe Xhulio Mehmeti edhe ky i dëmtuar. Në pikëpyetje mbetet prezenca e Taulant Kuqit, vlonjatit polivalent që mund të luajë si në qendër të mbrojtjes ashtu edhe në mesfushë.
Me kaq shumë mungesa transferta e Gjirokastrës bëhet një malore e vërtetë për Kamzën, por këto duele duhen fituar nëse skuadra e trajnerit Ndreu synon të qëndrojë edicionin e ardhshëm në elitën e futbollit shqiptar. Shpresat e golit janë të varura tek sulmuesi serb Stevan Racic që ndaj Teutës u zhbllokua nga pika e bardhë e penalltisë këtë edicion.
