Kapiteni legjendar i Chievos, Sergio Pellissier ka sulmuar sot hapur ish trajnerin e veronezëve, Gianpiero Ventura, i cili dha dorëheqjen pasi skuadra barazoi me rezultatin 2-2 në sfidën përballë Bolognës në “Bentegodi”.
“Donte të ikte, që ditën e parë që erdhi te skuadra jonë. Kush e do një skuadër, nuk e braktis siç bëri Ventura. Fitohet dhe humbet bashkë”, deklaroi Pellissier.
Sulmuesi 39-vjeçar luan prej 17 sezonesh me skuadrën e Chievos, ndërsa pranoi se pas 22 vitesh si profesionist, është hera e parë që shikon një sjellje si ajo e ish teknikut të Kombëtares Italiane, që jep dorëheqjen pa ia kërkuar kush.
“Është një çmenduri. Pas 22 vitesh si profesionist, mendoja se i kisha parë të gjitha, por jo. Sot për herë të parë pashë që një trajner të largohet në këtë mënyrë dhe pasi ka marrë pikën e parë me skuadrën”, shtoi kapiteni i veronezëve.
Ventura mori drejtimin e Chievos para 4 javësh ndërsa në 4 takime regjistroi 3 humbje dhe një barazim. Kjo ishte skuadra e parë që Ventura drejtoi, pas shkarkimit nga Italia, me të cilën dështoi të kualifikohej në “Rusi 2018”.
