Kastrioti erdhi nga hiçi për të tentuar mbijetesën deri në sprintin final. Triumfi ndaj Flamurtarit u shoqërua me humbjen e Tiranës në derbi, kombinimi i duhur i rezutlateve që çon tashmë Kastriotin të shpresojë realisht për të qëndruar mes më të mirëve. Periudha e dhuratave përfundoi dhe tashmë kur kanë mbetur 3 javë deri në fund gjithçka varet nga këmbët e vetë krutanëve. Diferenca me Tiranën është shkurtuar në 2 pikë ndërkohë që fundjava e ardhshme rezervon përballjen direkte midis tyre në Selman Stërmasi.
Një duel që vlen sa i gjithë sezoni, pasi krutanët kanë mundësinë të bëjnë rokadën në klasifikim me bardheblutë për të ruajtur deri në fund pozitat që i sigurojnë mbijetesën. Deri fundjavën e kaluar skuadra e Bledar Devollit përveçse ka tentuar të marrë rezultatet e veta ka patur vëmendjen edhe tek dhuratat që vinin nga stadiumet e Kategorisë Superiore, duke përfituar në maksimum nga ndalesat e rivalëve.
Në rifillimin e kampionatit në muajin janar situata e Kastriotit ishte e pashpresë, ndërkohë që në 15 javët e luajtura janë 8 fitore, 4 barazime dhe vetëm 3 humbje. 28 pikë të cilat kanë vlejtur për të synuar deri në fund mbijetesën me një emër të madh të futbollit shqiptar si Tirana. Tashmë gjithçka varet nga vetë djemtë e drejtuar nga Devolli, pavarësisht se kalendari deri në fund nuk është i favorshëm, pasi dueli direkt me Tiranën shoqërohet nga sfida në shtëpi me Teutën dhe më pas transferta me Kukësin.