Në një kohë kur në kampionatin shqiptar diskutohet nëse numri i lojtarëve të huaj duhet rritur, Kastrioti është skuadra e vetme që projektin e ka bazuar te lojtarët e perspektivës. Afrimet në merkato e konfirmojnë këtë, me klubin që i ka vendosur në dispozicion trajnerit Plori futbollistë të talentuar, të cilët kanë nënshkruar kontrata afatgjata.
Kastrioti zyrtarizoi afrimin e Julian Shehut, por edhe të sulmuesit të ri, Patrik Bardhi. Shehu është një lojtar i ri në moshë, vetëm 20-vjeçar, që kthehet në Shqipëri pas aventurës së sezonit të kaluar me grekët e Panilakosit. Mesfushori firmosi kontratë 3-vjeçare me krutanët.
Tjetër afrim i perspektivës është edhe sulmuesi Bardhi, i cili u largua si lojtar i lirë nga Tirana, pavarësisht se sezonin ka luajtur mbi 500 minuta nën urdhrat e Ze Marias, duke realizuar edhe dy gola. Nga situata e krijuar rreth sulmuesit 20-vjeçar përfitoi Kastrioti, që u bindën pas provës disa-ditore, me lojtarin që dha sinjale të mira në fazën përgatitore në Bullgari.
Edhe për Patrik Bardhin kontrata e firmosur është 3-vjeçare. Investimi te lojtarët e rinj dhe marrëveshjet afatgjatë, konfirmojnë se te Kastrioti nuk mendojnë të jenë thjesht kalimtarë në Kategorinë Superiore, por kanë hedhur bazat e një projekti të ri dhe afatgjatë, duke qëndruar gjatë në elitën e futbollit shqiptar.
