Investitorët nga Katari, që janë gati të bëjnë një ofertë për blerjen e Manchester United, janë besimplotë se nuk do të ketë kundërshti nga ana e pronarëve shtetërorë të Paris Saint Germain. Së fundmi, në Britani ka dalë lajmi se një numër pasanikësh nga shteti i pasur me burimet e naftës pritet të bëjnë një ofertë për klubin anglez para skadimit të afatit në mesin e shkurtit.
Ata duan ta “armatosin” trajnerin Eric Ten Hag me një arsenal të fuqishëm armatimi për ta rikthyer United në majën e futbollit botëror, aty ku ata besojnë se është vendi i këtij klubi. Fillimisht u mendua se pengesë në këtë tentativë mund të ishin pronarët e klubit francez, grupi Qatar Sports Investment.
Gjithsesi kjo është një çështje që po ekzaminohet nga ekspertët e angazhuar nga grupi i personave që duan të blejnë Manchester United. Ata janë të ndarë nga Qatar Sports Investment dhe paratë që do të hedhin do të jenë në formën e një fondi individual sesa një fondi sovran, që i përket shtetit, siç është ai që ka PSG. Për këtë arsye blerësit e mundshëm të Manchester United kanë besim se pronarët katariotë të PSG-së nuk do t’u hapin probleme.
Gjithashtu është zbuluar se grupi i blerësve, që janë besimplotë se oferta e tyre do të jetë më e forta, janë duke bërë që tani plane për atë se çfarë duhet të bëjnë pas blerjes. Qëllimi i tyre është të bëjnë investime të konsiderueshme çka do të lejonte Ten Hag, që po ringre United për ta forcuar ndjeshëm akoma më tepër skuadrën në dispozicion.
