Vitet kalojnë dhe shumë gjëra ndryshojnë, por jo për Bayernin e Mynihut, që vijon të theksojë edhe më shumë dominimin në futbollin gjerman, teksa pasditen e sotme ka konfirmuar forcën përballë rivalit direkt për titull, Bayer Leverkusenit.
Në “Bay Arena” përballeshin dy skuadra që mbanin vendin e parë me nga 16 pikë secila pas 7 javëve të para dhe pritej të zhvillohej një sfidë mjaft interesante, por bavarezët e Nagelsmann e vranë shumë shpejt, duke bërë monotone më shumë se gjysmën e saj.
Që në minutën e katërt ishte bomberi polak Robert Lewandowski që shënoi golin e avantazhit për bavarezët, ndërsa “aspirinat” u përpoqën të rikthejnë baraspeshën, por rezistuan deri në minutën e 30’.
Kjo pasi për 7 minuta bavarezët shënuan edhe katër herë të tjera me Lewën, Muller dhe Gnabry dy herë, duke çuar shifrat në 0-5 dhe duke mbyllur plotësisht llogaritë e ndeshjes, ndonëse kishte ende më tepër se 50 minuta për t’u luajtur.
Në pjesën e dytë bavarezët u mjaftuan me një menaxhim të mirë të lojës dhe energjive, ndërsa vendasit shënuan golin e nderit me anë të Patrick Schick në minutën e 55-të, duke bërë që ndeshja të mbyllej 1-5.
Pas kësaj fitoreje, Bayerni i Mynihut ngjitet në kuotën e 19 pikëve, i vetëm në krye të renditjes, tashmë i ndjekur nga Borussia Dortmund me 18 pikë, ndërsa Leverkusen zbret në vendin e tretë me 16 pikë.
Në sfidën tjetër të Bundesligës, Arminia Bielefeld ia doli të marrë një pikë mjaft të vlefshme në transfertën ndaj Augsburgut, falë barazimit 1-1, të arritur vetëm 13 minuta para fundit të lojës.
Vendasit gjetën avantazhin me anë të Oxford në minutën e 19’, ndërsa miqtë barazuan në të 77-ën me anë të Laursen. Augsburg dërgoi sërish topin në rrjetë një minutë më vonë, por këtë herë goli u anulua për pozicion jashtë loje dhe deri në fund mbeti i pandryshuar rezultati 1-1.
