Vjen edhe zyrtarizimi, Vincente Moreno nuk është më trajneri i Espanyolit. Drejtuesit e klubit katalanas kanë shkarkuar 47-vjeçarin, i cili qëndronte në stol prej gushtit të vitit 2020.
“Klubi vlerëson punën e trajnerit dhe stafit teknik në këto dy vite ku u rikthyem dhe forcuam pozitat në La Liga”, lexohet në komunikatën zyrtare të Espanyolit, pjesë e të cilëve është edhe Keidi Bare, mesfushori i kombëtares.
Një nga emrat që pëlqehet shumë nga presidenca është Fabio Cannavaro. “Topi i Artë” i fundit italian (2006) është gati të provojë aventurën e parë si trajner në kontinentin e vjetër, pas eksperiencave në Kinë.
Espanyoli renditet në vend të 13-të në kampionatin spanjoll, kur kanë mbetur dy javë përpara fundit. Ndërkohë, Bare numëron 1 gol dhe 2 asiste në 28 ndeshje sezonale.
