Sebastien Kehl, drejtori sportiv i Borussias së Dortmundit, siguroi se deri më tani, klubi verdhezi nuk ka marrë asnjë ofertë për Jude Bellingham.
Mesfushori pati rëndësi të madhe në Botërorin e Katarit për Anglinë dhe emri i tij është lidhur me një transferim të mundshëm te Liverpooli, në një marrëveshje që mund të kalojë 100 milionë euro. Tani për tani gjithçka është në qetësi te Dortmundi, siguron drejtori.
“Nga pikëpamja sportive, do të më pëlqente që Bellingham të qëndronte në Dortmund për shumë vite. Shitja e Bellinghamit… Nuk e di se si mund të evoluojnë gjërat në muajt e ardhshëm, nuk jam magjistar, por garantoj që lojtari është plotësisht i fokusuar te Dortmundi”, ka theksuar Kehl për “German Sky”.
Bellingham, 19 vjeç, iu bashkua skuadrës gjermane nga Birminghami në vitin 2020 për 25 milionë euro. Këtë sezon ai ka shënuar 10 gola dhe ka dhënë katër asistime në 23 ndeshje.