Nuk ka paqe për Loris Karius pas finales së hidhur të Champions League, ku u bë protagonist negativ për Liverpoolin me dy gafa të rënda për një portier profesionist. “Gardiani” gjerman është vënë në shënjestër në rrjetet sociale, madje në profilin e tij janë pikasur, përveçse ofendime të shumta, edhe kërcënime me vdekje, që kanë tërhequr vëmendjen e policisë angleze, e cila ka vendosur të nisë hetimet
“Po hetojmë rreth mesazheve që kanë mbërritur nëpërmjet rrjeteve sociale e që na duken ekstremisht serioze, – ka shpjeguar një zëdhënës i forcave të sigurisë për BBC. – Të gjitha kërcënimet do të kontrollohen dhe regjistrohen”.
Pas gabimeve trashanike, lotëve dhe ndjesës ndaj tifozëve të Liverpoolit, për portierin gjerman Karius finalja e Championsit është shndërruar një makth edhe më i rëndë. Një plagë e thellë në shpirt, e vështirë për t’u shëruar brenda dhe jashtë fushës së blertë.