Mesfushori që është grumbulluar për herë të parë me Kombëtaren, Kristjan Asllani ka thënë sot se nuk e mendonte se do merrte ftesë nga përfaqësuesja.
Duke folur në konferencën për mediet përpara ndeshjes miqësore me Spanjën, që do të luhet më 26 mars në orën 19:45 në “RCDE” të Barcelonës, Asllani theksoi se ka si qëllim vetëm të bëjë mirë dhe të ndihmojë skuadrën.
I pyetur për lajmet që po qarkullojnë në Itali për interesimin e klubit të Milan për të, lojtari i Empolit theksoi se nuk do dëshironte që t’i diskutonte këto gjëra.
Hera e parë në Kombëtare, si ndjehesh? “Jam shumë i lumtur, unë Kombëtaren e shihja vetëm në TV dhe kjo është një kënaqësi e madhe për mua.
A e mendoje se do merrje ftesë nga Kombëtarja? “Nuk e mendoja, nuk e besoja, por erdhi kjo ftesë, shpresoj të bëjmë mirë dhe ndihem mirë.”
Si kanë qenë këto tre ditë dhe a ju tremb ndeshja me Spanjën? “Jo nuk na tremb. Këto tre ditë kanë qenë shumë të bukura. Shpresojmë të bëjmë një ndeshje shumë të mirë.”
Cilësia: “Shpresoj që po. Unë do jap maksimumin dhe shpresoj t’i jap ndihmë Kombëtares.”
Pse kaq shumë lojtarë nga Italia në Kombëtare? “Kampionati italian është shumë i vështirë dhe kur vjen këtu ndihesh më mirë.”
Me cilin mesfushor të Kombëtares ndër vite mendon se ngjason? “Nuk e di, këtë mund ta thoni ju që e shikoni sportin nga jashtë.”
A do debutosh në ndeshjen me Spanjën? “Nuk e di, këto gjëra i di trajneri. Unë jam i përqendruar te stërvitja dhe ndeshja dhe shpresoj të na vinë shumë tifozë.”
Je vazhdimisht titullar te Empoli ndërsa tani po flitet për kalim te Milani, si është e vërteta? “Unë nuk e di, nuk i kam shumë qejf zërat e merkatos. Vetëm mendoj për Empolin dhe do bëj gjithçka për të ndihmuar skuadrën.”
Një mesazh për lojtarët e rinj: “Me këmbë në tokë dhe shumë stërvitje.”