Një trajner për Partizanin. Edhe pse drejtuesit në klubin e kuq mbeten diskretë në maksimum dhe në dukje nuk ka zhvillime, risia është se pista e huaj ka rënë dhe është kthyer në modë dashuria për teknikët shqiptarë. Mario Tokic ishte një ndër emrat më të kuotuar për të marrë drejtimin e skuadrës së kuqe. Tratativat me kroatin, që erdhi madje dhe në Tiranë në prill për të ndjekur nga stadiumi ndeshjen e Partizanit me Skënderbeun, kanë zgjatur tre muaj, por në fund nuk është arritur një akord dhe Tokic nuk do të jetë trajneri i ri i të kuqve.
Mladen Milinkovic ka qenë më shumë se një ide. Ai me ish-trajnerin e Luftëtarit dhe Kukësit mund të konsiderohet një flirtim, por që nuk ka arritur të shndërrohet në diçka më serioze për një marrëdhënie konkrete dhe emri i tij tashmë është braktisur. Me pistat e huaja të rrëzuara tani te Partizani po mendojnë për një trajner shqiptar dhe pavarësisht kandidaturave që qarkullojnë në tregun mediatik është e kotë të aludohet me emra të përveçëm. Kjo në respekt të qëndrimit të zyrtar të klubit, por edhe sepse drejtuesit mund të surprizojnë edhe në këtë drejtim, pasi ekziston e fortë edhe ideja për t’i dhënë besim një emri të ri, duke e promovuar, sigurisht duke i dhënë në dorëzim një skuadër të fortë dhe me potencialin për të arritur objektivat madhorë që diktojnë historia dhe ambiciet e kuqe.
