Humbja 3-0 ndaj Brazilit ishte shokuese për Kilin që humbi mundësinë për të marrë pjesë në Kupën e Botës. Alexis Sanchez e Arturo Vidal me shokë do ta ndjekin nga televizori, kompeticionin e madh të verës së ardhshme edhe pse La Rojas amerikano-jugore mund ti mjaftonte një barazim ndaj Brazilit të kualifikuar matematikisht në Rusi 2018 që më herët, për të siguruar të paktën pjesëmarrjen në Play-off.
Menjëherë pas humbjes ndaj Seleçaos trajneri Juan Antonio Pizzi ka marrë të gjithë përgjegjësitë mbi vete duke dhënë dorëheqjen nga detyra si numri 1 i stolit të Kilit. Presidenti i federatës kiliane të futbollit Arturo Salah ka mbetur i surprizuar nga vendimi i Juan Antonio Pizzit duke deklaruar se do të shqyrtojë zgjedhjen e 49-vjeçarit argjentinas por ndërkohë për momentin nuk do të kërkojë një trajner të ri.