Lionel Messi duket i bindur për të lënë Barcelonën dhe madje shumë i sigurt që klubi i tij i ardhshëm nuk do të duhet të paguajë 700 milionë euro për kartonin e tij, aq sa është edhe klauzola e prishjes së kontratës së tij me klubin blaugrana.
Kjo pasi siç raportojnë mediat spanjolle, më 2017-ën Messi firmosi rinovimin për 3 sezone, me opsion zgjatjeje edhe për një të katërt, por në kontratë nuk është specifikuar që klauzola prej 700 milionë eurosh vlen edhe për vitin e katërt.
Pikërisht për këtë arsye, Messi ndihet i qetë dhe i sigurt që largimi nga Barcelona do të ndodhë shumë shpejt, pavarësisht se ai dhe avokatët e tij nuk dëshirojnë skenarin e një “divorci” nëpër salla gjyqi.
Pas 20 vitesh me fanellën e Barcelonës, Messi është ofruar për t’u takuar me drejtuesit dhe për të përgatitur një ndarje me marrëveshje, që do të ishte opsioni më i mirë për të dy palët, por deri tani Bartomeu nuk ka dhënë një përgjigje.
E në pritje të një përgjigjeje zyrtare, ylli argjentinas ka vendosur të mos paraqitet sot për të kryer testin anti-koronavirus, duke bërë kështu të pashmangshme mungesën e tij nesër në ditën e parë të përgatitjeve për sezonin e ri.
Pas letrës së dërguar me “burofax” të martën e kaluar, kur kërkonte zgjidhjen e kontratës, tani Messi është i vendosur të presë përgjigjen e drejtuesve të Barçës, që nëse do të vonojë, mund të bëjë që çështja të vendoset në organet kompetente.
