Jurgen Klopp kundër shpenzimeve stratosferike. Trajneri i Liverpoolit ka shprehur hapur mosdakordësinë e tij në lidhje me shumat marramendëse që harxhojnë klube të ndryshme gjatë merkatos verore. Gjermani është treguar i drejtpërdrejtë duke drejtuar gishtin ndaj ekipeve si Reali i Madridit, Barcelona, PSG dhe Manchester City, të cilët duket se nga rregullat e fair play-t financiar nuk tremben aspak. Klopp u shpreh se nuk dëshiron të flasë shumë rreth merkatos që bëjnë këto klube, por shprehu habi për shpenzimet që kryejnë. Ndërkohë më pas numri një i stolit të The Reds, shtoi se tek Liverpooli të tilla shpenzime nuk mund të bëhen dhe madje nëse ndodh duhet menduar mirë.
Në fakt Liverpooli është pjesë e këtyre klubeve që ka shpenzuar shuma të majme në merkato, pasi transferimet i Allison, Fabinhos, Keitas dhe Shaqirit i kushtuan plot 200 milionë euro klubit, por për këtë pjesë Klopp deklaroi disi edhe me humor se kanë ende fatura për të paguar, por suksesi në Champions i ka ndihmuar jo pak financat e Liverpoolit. Deri më tani The Reds kanë qëndruar në hije duke mos realizuar asnjë goditje të bujshme ne merkato.