Maroku ishte padyshim surpriza më e bukur e Botërorit të Katarit, duke bërë paraqitje fantastike, të cilat e renditën të katërtën e botës, rezultat ky historik për një komb afrikan.
Një nga futbollistët më të spikatur të marokenëve ishte mesfushori Sofyan Amrabat dhe pikërisht falë paraqitjes së tij, në dyert e Fiorentinës kanë trokitur shumë klube të mëdha.
Liverpool, Paris Saint Germain, Barcelona dhe Atletico Madrid janë treguar të gatshme të paguajnë për kartonin e mesfushorit 26-vjeçar, i cili në Katar konfirmoi se është gati të luajë në nivele më të larta.
Fiorentina “fërkon duart”, pasi synon të arkëtojë të paktën 40 milionë euro nga kartoni i mesfushorit, teksa ankandi mund të rritë edhe më shumë çmimin.
