Enea Koliçi e mbylli sezonin e shkuar si një ndër portierët me performancën më pozitive edhe pse skuadra e Flamurtarit nuk po notonte në pishinën me para, gjatë periudhës së verës ofertat nuk munguan në drejtim të 33-vjeçarit, i cili në fund zgjodhi klubin më të sukseshëm të dekadës së fundit në Shqipëri, Skënderbeun. Nuk është e njëjta skuadër që dominonte futbollin tonë, por gjithsesi gardiani porgradecar nuk shfaq shenja pendese për zgjedhjen e bërë.
Në korridoret e futbollit është përmendur shpesh fjalia “Skënderbeu nuk ka motiv e as objektiva” duke iu referuar këtu dënimit 10-vjeçar të përcaktuar nga UEFA e të konfirmuar nga KAS-i, sipas Koliçit nuk është aspak e vërtetë që bardhekuqtë nuk kanë synime në këtë sezon.
Pas javës së 17-të dhe në prag të rifillimit të kampionatit korçarët ndodhen në vendin e 8-të, pozicion që të dërgon në play-out, vend për përmirësim ka, dhe reduktimi i luhatjeve është detyra më e rëndësishme për pjesën e dytë të edicionit.
