Kombëtarja shqiptare kreu paraditen e kësaj të Marte, seancën e dytë stërvitore në kompleksin “Tropikal” në Durrës. Kuqezinjtë vazhdojnë përgatitjet për sfidën e të Premtes ndaj Spanjës që do të luhet në Alicante.Risia në stërvitjen ishte prania e portierit të Kukësit Enea Koliçi, i cili u bashkua me skuadrën, duke marrë vendin e të dëmtuarit Thomas Strakosha.
Seanca nisi me këshillat e trajnerit Christian Panucci për futbollistët, ndërkohë që mbrojtësi i Napolit Elseid Hysaj dhe kapiteni Ansi Agolli edhe këtë herë u stërvitën të diferencuar për shkak të disa problemeve të vogëla fizike, por me shumë gjasa të dy lojtarët e krahut në repartin e tërhequr do të jenë gati për sfidën ndaj La Rojas.