Kategoria e Parë

Korabi prezanton trajnerin e ri dhe fillon përgatitjet

Skuarda e Korabit ka prezantuar pasditen e sotme trajnerin e ri dhe ka nisur përgatitjet në Pezë Helmes. Dibranët i kanë besuar stolin Dorian Bubeqit, që në pjesën e parë të sezonit drejtoi Erzenin e Shijakut dhe arriti rezultate të kënaqshme.

Krahas Bubeqit, drejtuesit e klubit dibran prezantuan edhe 2 mbrojtës të rinj, që do të mbrojnë ngjyrat e Korabit në pjesën e mbetur të sezonit. Bëhet fjalë për Elert Kallucin, që ashtu si trajneri vjen nga skuadra e Erzenit dhe Erand Hoxhën, që vjen nga Besa e Kavajës.

Menjëherë pas prezantimit zyrtar, trajneri i sapoemëruar Bubeqi nuk humbi kohë dhe drejtoi edhe stërvitjen e parë me skuadrën e Korabit. Dibranët e mbyllën pjesën e parë të sezonit në vendin e 3-të, pas Tiranës dhe Besëlidhjes, ndërsa pretendimet janë që të rikthehen sërish në Kategorinë Superiore.

To Top