Një hap në drejtimin e gabuar, me Kukësin që nuk ia doli të thyente Laçin dhe diferenca me Partizanin u thellua në 5 pikë. Nuk ishte ky ristarti që të gjithë kishin shpresuar në kampin blu, sepse çdo pikë e lënë rrugës, mund të ndikojë në arritjen apo jo të objektivit përfundimtar. Gëzim Krasniqi, i cili e ka fituar me të drejtë vendin e titullarit, ka një argument që shpjegon bllokimin e ingranazheve të Kukësit.
“Nuk e prisnim këtë rezultat, por duke pasur parasysh terrenin, ishte një fushë që i përshtatej më shumë kundërshtarit, që luante në mbrojtje”, tha Krasniqi.
Flamurtari është kthyer në një makth për nënkampionët gjatë këtij sezoni, situata aktuale e vlonjatëve nuk është ndër më optimistet dhe mungesat janë të shumta, por qendërmbrojtësi nuk kërkon të bie në “kurthin” e përgjumjes.
“Ne nuk duhet të vihemi në gjumë nga problemet e Flamurtarit, por duhet të shkojmë atje të mobilizuar maksimalisht, me synimin e vetëm, të marrim 3 pikët”, tha mbrojtësi.
Titulli i dytë kampion është i vetmi objektiv dhe 5 pikët e distancës me Partizanin nuk e kanë demoralizuar 29-vjeçarin, i cili mendon se pikët për të provuar rikuperimin, janë të gjitha në dispozicion.’
“Janë edhe 17 javë të tjera dhe plot 51 pikë në lojë, ndaj ka akoma shumë kohë për të rikuperuar diferencën nga Partizani”, theksoi Gëzim Krasniqi.
